ស្រីៗមើលឧស្សាហ៍ស្ទាបពិនិត្យមើលខ្លួនឯងផង មហារីកសុដន់ ដំណាក់កាលទី៤ ជាដំណាក់កាលចុងក្រោយ និងធ្ងន់ធ្ងរបំផុត។ ខាងក្រោមនេះជារោគសញ្ញាខ្លះៗដែលអ្នកជំងឺអាចមាន៖
១- សុដន់មានដុំ
ដំណាក់កាលដំបូង ដុំមហារីកមានទំហំតូចណាស់ រហូតដល់យើងមិនអាចកត់សម្គាល់ ឬដឹងអ្វីទាំងអស់ លុះត្រាតែថត (ស្កេន) ឬប្រើតិចនិករកមើលកោសិកាមហារីក ទើបដឹង។
និយាយអ៊ីចឹង មិនមែនទាល់តែដល់ដំណាក់កាលទី៤ ទើបសាមីខ្លួនអាចស្ទាបដឹងនោះទេ។ ស្រ្តីមួយចំនួនចាប់ផ្តើមមានអារម្មណ៍ថាមានដុំ នៅនឹងទ្រូង។ តែជួនកាល អាចមានក្លៀក ឯអ្នកខ្លះមានអារម្មណ៍ថាហើមទាំងនៅជុំវិញសុដន់ និងក្លៀក។
២- ស្បែកចាប់ផ្ដើមប្រែ
មហារីកសុដន់ខ្លះ អាចធ្វើឲ្យស្បែកអ្នកជំងឺខុសធម្មតា ដូចជា ជំងឺ Paget’s disease ជាជំងឺមហារីកមួយប្រភេទដែលមានដុះដុំសាច់នៅក្បាលសុដន។ អារម្មណ៍ថារមាស់ ឬចាក់ៗស្បែក ស្បែកឡើងក្រាស់ ឬក្រហម ហើយពេលខ្លះទៀត ស្បែកអាចប្រះ និងស្ងួត ជាអាការៈដែលអាចកើតមានឡើង។ ស្បែកប្រែប្រួល អាចមកពីមហារីកសុដន់ កើតឡើងដោយសារការរលាក ឬដោយសារសរសៃទឹករងៃស្ទះកោសិកាមហារីក ដែលនាំឲ្យមានការឡើងក្រហម ហើម និងខូងស្បែក ដែលជារោគសញ្ញាមហារីកសុដន់ ដំណាក់កាលទី៤ ក្នុងករណីអ្នកជំងឺមានដុំមហារីកធំ។
៣- មានទឹកហូរពីសុដន់
នេះជារោគសញ្ញាមួយដែលអ្នកមហារីកសុដន់គ្រប់ដំណាក់កាលទាំងអស់ តែងជួបប្រទះ។ ទឹកដែលហូរចេញ អាចមានពណ៌ថ្លា ពណ៌លឿងដូចខ្ទុះ ឬពណ៌ក្រហមដូចឈាម។
៤- សុដន់ហើម
ក្នុងដំណាក់កាលដំបូងនៃមហារីក សុដន់មើលទៅធម្មតា ប៉ុន្តែនៅដំណាក់កាលបន្ទាប់ៗ អាចចាប់ផ្តើមហើមនៅម្ដុំសុដន់ ឬអាចរាលដល់ក្លៀក ដោយសារមានដុំមហារីកធំ និងក្រពេញទឹករងៃហើមធំនៅក្រោមក្លៀក។ ទឹករងៃ កកស្ទះ បង្កើតជាការហើម។
រោគសញ្ញាផ្សេងៗទៀតមានដូចជា៖
- ឈឺសុដន់
- អស់កម្លាំង
- គេងអត់លក់
- ឈឺក្រពះ
- អត់ឃ្លាន
- ស្រកគីឡូ
- ពិបាកដកដង្ហើម។
ក្នុងដំណាក់កាលទី៤នេះ មហារីកអាចរាលដាលដល់សរីរាង្គផ្សេងៗដូចជា សួត ថ្លើម និងឆ្អឹង ដែលជាកន្លែងពេញនិយមជាងគេ។
ដោយ៖ ឌុក បញ្ញារ័ត្ន
ណែនាំដោយ លោកវេជ្ជបណ្ឌិត ចាន់ ស៊ីណេត
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬមិនព្យាបាលជូនឡើយ៕
ប្រភព៖ facebook page Hello គ្រូពេទ្យ


