ស្រីៗពិបាកខ្លាំងណាស់ទៅហើយ ពេលពពោះ ហើយក្រោយសម្រាលកូន ក៏មិនស្រួលដែរ ត្រូវមើលថែកូន ធ្វើម៉េចឲ្យមានសុខភាពល្អ ធំឡើងឆ្លាត។ ជាក់ស្ដែង ការលើកបី ពកូនអត់ត្រឹមត្រូវ ខុសបច្ចេកទេស នាំឲ្យស្រីៗគ្នាយើងឈឺចង្កេះ ឈឺឆ្អឹងខ្នងជាមិនខាន ជាពិសេសពេលកូនកាន់តែធំធ្ងន់ឡើងៗ។ ថ្ងៃនេះ “Hello គ្រូពេទ្យ” នឹងបង្ហាញបច្ចេកទេសលើកបី ពកូន យ៉ាងម៉េចកុំឲ្យឈឺខ្នង ឬចង្កេះ៖
១- ឈឺខ្នងកើតគ្រប់ស្ត្រីពពោះ
ជារឿងធម្មតាទេដែលម្ដាយកំពុងពពោះ ស្រែកថាឈឺខ្នងៗ តែពេលសម្រាលរួចប្រហែល ២-៣ សប្ដាហ៍ នឹងលែងឈឺដោយឯកឯង។ ដល់ពេលសម្រាលរួច ម្ដាយត្រូវព ឬបីកូន នោះការឈឺខ្នងនឹងត្រលប់មកវិញម្ដងទៀត។
លើក ឬបីទារកតិចច្រើន ធ្វើឱ្យឆ្អឹងខ្នងធ្វើការធ្ងន់។ ពេលទារកទើបកើតទម្ងន់ ៣-៥ គីឡូក្រាម ម្ដាយជាធម្មតាលើកបីពកូនជាមធ្យម ៥០ ដង/ថ្ងៃ។ ទារកនឹងមានទម្ងន់រហូតដល់ ៨ គីឡូក្រាមនៅពេលអាយុ ១ ឆ្នាំ និងអាចដល់ ១៣-១៥ គីឡូក្រាម នៅពេលអាយុ ២ឆ្នាំ។ កាន់តែខ្លាំងជាងហ្នឹងទៀត គឺរាល់ការបីក្មេងម្ដងៗ ម្ដាយត្រូវទប់លំនឹង និងថ្នមខ្លាំងមែនទែន។ សាកស្រមៃមើលថា បើម្ដាយបីកូនពីមួយថ្ងៃទៅមួយថ្ងៃ តើឆ្អឹងខ្នងនឹងទៅជាយ៉ាងណា?
សំណាងល្អវិញ មានគន្លឹះមួយចំនួនអាចការពារ និងកាត់បន្ថយការឈឺខ្នងបាន។
២- ការពារមិនឱ្យឈឺខ្នង
វិធីបង្ការកុំឱ្យឈឺខ្នងអាចអនុវត្តបានទាំងម៉ាក់ និងប៉ា ព្រោះប៉ាៗក៏ជាអ្នកឧស្សាហ៍លើកបីកូនដែរ។
លក្ខខណ្ឌទូទៅ
ធ្វើលំហាត់ប្រាណ៖ ការហាត់ប្រាណ ធ្វើឱ្យមានសុខភាពល្អ មិនថាជំងឺអ្វីក៏ដោយ ប៉ុន្តែសម្រាប់ស្ត្រីទើបសម្រាលកូនរួច សូមពិភាក្សាជាមួយគ្រូពេទ្យជាមុនសិន ថាតើរយៈពេលប៉ុន្មានខែក្រោយសម្រាល ទើបអាចហាត់ប្រាណបាន ហើយត្រូវហាត់ពេលណា ជាមួយឧបករណ៍អ្វី។
បើគ្រូពេទ្យអនុញ្ញាតឱ្យហាត់ប្រាណហើយ ម្ដាយគួរប្រុងប្រយ័ត្ននឹងហាត់ប្រាណ កុំកញ្ឆក់ៗ ឬលើរបស់ធ្ងន់ៗ។ យកល្អ គួរហាត់របៀបយ៉ូហ្កាឱ្យបានច្រើន។
របៀបលើកទារក
- ពេលយើងឱនចុះក្រោម លើកក្មេងព ត្រូវចៀសវាងឱនពត់ខ្នងខ្លាំងពេក ព្រោះអាចធ្វើឱ្យឈឺចង្កេះខ្លាំង។ វិធីត្រឹមត្រូវ គឺឱនចុះបន្តិច និងលត់ជង្គង់ចុះម្ខាង កាន់ក្មេង និងលើកក្មេងឡើង ដោយប្រឹងក្បាលពោះ និងកម្លាំងជើង។
- សូមកុំលើកទារកឡើងដោយប្រើដៃយោងព គឺត្រូវឱបទារកនោះជាប់នឹងដើមទ្រូវសិនសឹមងើបឡើង។
ពេលបំបៅដោះកូន
- ពេលបំបៅដោះកូនជាប់នឹងដើមទ្រូង ម្ដាយមិនគួរងើបឈរនោះទេ។ ម្ដាយត្រូវគេងផ្អៀងម្ខាង និងដាក់កល់ខ្នើយសមស្រប ដើម្បីអាចឱ្យកូនបៅបណ្ដើរ និងគេងបណ្ដើរ។
- ពេលអង្គុយបំបៅដោះ ម្ដាយត្រូវអង្គុយត្រង់ខ្លួន និងនៅលើកៅអីរឹង ជាជាងកៅអីដែលមានពូកទន់ៗ។
ពេលបីកូនដើរ
- ពេលធ្វើដំណើរដោយថ្មើរជើង ហើយពកូន គួរមានកាបូបសម្រាប់ដាក់ទារកខាងមុខដើមទ្រូង ជាជាងបីដោយដៃច្រើនពេក។
- ចៀសវាងដាច់ខាតពកូននៅចង្កេះ ព្រោះនឹងនាំឱ្យឈឺទាំងចង្កេះ និងខ្នង។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ប្រភព៖ គេហទំព័ររបស់ hellokrupet.com

