ជំងឺមហារីក​មាត់ស្បូន​បង្ក​ឡើង​ដោយ​វីរុស Human Papillomavirus (HPV) ឆ្លង​តាម​រយៈ​ការ​រួមភេទ និងការប៉ះពាល់ស្បែកដែលដាច់រលាត់ ។ ជំងឺ​នេះ​គ្មាន​រោគ​សញ្ញា​អ្វី​ទាំង​អស់នៅក្នុងដំណាក់ដំបូង ប៉ុន្តែ​នៅ​ដំណាក់​កាលចុង​ក្រោយ​មាន​ធ្លាក់​ឈាម មាន​ន័យថា​យឺត​ពេល​ហើយ។

បើ​តាម​ទិន្នន័យ​របស់​អង្គការ​សុខភាព​ពិភពលោក (WHO) ជំងឺ​មហា​រីក​មាត់​ស្បូន គឺ​ជា​មូលហេតុ​ចម្បង​នៃ​ការ​ស្លាប់ដោយ​ជំងឺ​មហារីក​ក្នុង​ចំណោម​ស្ត្រី​នៅ​កម្ពុជា ហើយ​យ៉ាង​ហោចណាស់​មាន​ស្ត្រី​ចំនួន ៩០០ នាក់​បាន​ស្លាប់​ដោយ​ជំងឺ​នេះ​ជា​រៀង​រាល់​ឆ្នាំ។

ត្រូវចាក់ថ្នាំបង្ការ HPV នៅពេលណា? អាយុប៉ុន្មាន?

មិន​ចាំបាច់​តែ​ស្រីៗ​ដែល​មាន​ដៃគូ​នោះ​ទេ គ្នា​យើង​នៅ​លីវ​ ឬក្មេងស្រីៗដែល​មិន​ទាន់​ប្រលូក​រឿង​ផ្លូវ​ភេទ​ក៏​អាច​ចាក់​ថ្នាំ​បង្ការ​ជំងឺ​មហារីក​មាត់​ស្បូន​បាន​ដែរ ចាប់​ពី​អាយុ ៩ ឆ្នាំ​ឡើង​ទៅ។ នេះជារឿងសំខាន់ ដូច​ពាក្យ​ចាស់លោក​ថា “ការពារ​ប្រសើរ​ជាង​ព្យាបាល” ដូច្នេះ​ម៉ាក់ប៉ា​ដែល​មាន​កូនស្រី​ត្រូវ​ប្រញាប់​នាំ​ទៅ​ចាក់​វ៉ាក់សាំង​បង្ការ​ជាមុន ព្រោះ​ក្នុង​ករណី​ដែល​បាន​ឆ្លង​មេរោគ HPV ការ​ចាក់​ថ្នាំ​បង្ការ​នេះ​គ្មាន​ប្រសិទ្ធភាព​នោះ​ទេ។

តើត្រូវចាក់វ៉ាក់សាំងប៉ុន្មានដង?

ការ​ចាក់​ថ្នាំ​បង្ការ​ជំងឺ​មហារីកមាត់​ស្បូន ត្រូវ​ធ្វើ​ឡើង​ចំនួន ៣ ដង ទើប​គ្រប់​ដូស ដោយ​មួយ​លើកៗ​មាន​គម្លាត​ខុសៗ​គ្នា។

  • លើកទី១៖ ចាក់ភ្លាមៗ
  • លើកទី២៖ ១-២ ខែ បន្ទាប់ពីចាក់លើកទី ១
  • លើកទី៣៖ ៦ ខែ បន្ទាប់ពីចាក់លើកទី ១។

អ្នកណាខ្លះមិនអាចចាក់វ៉ាក់សាំងនេះបាន?

មិនមែន​នរណា​ក៏​អាច​ចាក់​វ៉ាក់សាំង​ការពារ​ជំងឺ​មហារីក​មាត់​ស្បូន​បាន​ទាំង​អស់​គ្នា​នោះ​ទេ វ៉ាក់សាំង​នេះ​មាន​ករណី​លើក​លែង​ចំពោះ​ស្រីៗ​គ្នា​យើង​មួយ​ចំនួន។

  • ធ្លាប់មានប្រតិកម្មធ្ងន់ធ្ងរជាមួយវ៉ាក់សាំងនេះពីមុន
  • ស្រ្តីមានផ្ទៃពោះ។

វ៉ាក់សាំងបង្ការមេរោគ HPV មានប្រសិទ្ធភាពកម្រិតណា?

វ៉ាក់សាំង​នេះ​អាច​ការពារ​ជំងឺ​មហា​រីក​ស្បូន​បាន​ច្រើន តែទោះ​យ៉ាង​ណា​ក្រោយ​ពេល​វ៉ាក់សាំង​រួច ស្ត្រី​ដែល​មាន​ដៃគូរួមភេទ​ត្រូវ​ពិនិត្យ​តាមដាន និង​ធ្វើ​តេស្ត​កោសិកា​មហារីក​មាត់​ស្បូន​ឲ្យ​ទៀង​ទាត់ជាមួយ​គ្រូពេទ្យ​ជំនាញ រៀងរាល់ ២-៣ឆ្នាំ/ម្តង។

ផលវិបាកអាចកើតមានក្រោយចាក់វ៉ាក់សាំង

មិន​ខុស​គ្នា​ប៉ុន្មាន​ពី​វ៉ាក់សាំង​ផ្សេងៗ​ទេ ការ​ចាក់​វ៉ាក់សាំង​ការពារ​ជំងឺ​មហារីក​មាត់​ស្បូន​អាច​មាន​ផល​រំខាន​ខ្លះៗ ឬ​ប្រតិកម្ម​អាលែកហ្ស៊ី​ជាដើម។ ផលវិបាក​ដែល​អាច​កើត​ឡើង រួមមាន៖

  • ឈឺ ឬហើមកន្លែងចាក់
  • ឈឺក្បាល ល្ហិតល្ហៃ
  • គ្រុនក្តៅ
  • រមូលពោះ ចង់ក្អួតចង្អោរ
  • ឈឺពោះ ឬរាករូស
  • ឈឺសាច់ដុំ ឬសន្លាក់ឆ្អឹង
  • វិលមុខ ធីងធោង
  • ប្រិតកម្មធ្ងន់ធ្ងរ (កម្រមានណាស់)។

បន្ទាប់​ពី​ចាក់​វ៉ាក់សាំង​រួច​ភ្លាម យើង​អាច​ធីងធោង ឬងងឹត​មុខ​មួយ​ស្របក់ ដូច្នេះ​ហើយ​គ្រូពេទ្យ​តម្រូវ​ឲ្យ​យើង​អង្គុយ​ចុះ ឬ​តម្រេក​ខ្លួន​ប្រហែល ១៥ នាទី ដើម្បី​បញ្ចៀស​បញ្ហា​នេះ។ ក្នុង​ករណី​មាន​ប្រតិកម្ម​ធ្ងន់ធ្ងរ ត្រូវ​ប្រញាប់​ប្រាប់​គ្រូពេទ្យ​ជា​បន្ទាន់។

ក្នុង​ករណី​មាន​សំណួរ ឬ​មន្ទិលសង្ស័យ​ជុំវិញ​សុខភាព​អ្នក ជម្រើស​ល្អ​បំផុត សូម​ពិគ្រោះ និង​ប្រឹក្សា​យោបល់​ផ្ទាល់​ជាមួយ​ពេទ្យ​ជំនាញ។ Hello Health Group មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕

ប្រភព៖ គេហទំព័ររបស់ hellokrupet.com